ភ្នំពេញ៖ កិច្ចប្រជុំដំបូងរបស់គណៈរដ្ឋមន្ត្រីលោក ហ៊ុន ម៉ាណែត នឹងត្រូវអនុញ្ញាតឱ្យមានការផ្សាយផ្ទាល់ ដែលកិច្ចប្រជុំនោះនឹងផ្សព្វផ្សាយពីគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា។
ក្នុងសេចក្ដីជូនដំណឹងចុះថ្ងៃទី២២ ខែសីហា រដ្ឋមន្ត្រីព័ត៌មានលោក នេត្រ ភក្ត្រា បានឱ្យដឹងថាគណៈរដ្ឋមន្ត្រីអាណត្តិទី៧ នឹងរៀបចំកិច្ចប្រជុំពេញអង្គដំបូងរបស់ខ្លួននៅព្រឹកថ្ងៃទី២៤ ខែសីហា ឆ្នាំ២០២៣ វេលាម៉ោង ៧និង៣០នាទីព្រឹកនៅវិមានសន្ដិភាពរាជធានីភ្នំពេញ។ កិច្ចប្រជុំដំបូងនេះនឹងដឹកនាំដោយនាយករដ្ឋមន្ត្រី ហ៊ុន ម៉ាណែត ដោយផ្ទាល់។
ក្នុងសេចក្ដីជូនដំណឹងនោះបានលើកឡើងថា៖ «ក្រសួងព័ត៌មាន សូមស្នើដល់ប្រព័ន្ធផ្សព្វផ្សាយជាតិ និងអន្តរជាតិទាំងអស់ចូលរួមផ្សាយបន្តផ្ទាល់ពីវិទ្យុ និងទូរទស្សន៍ជាតិកម្ពុជាស្ដីពីកិច្ចប្រជុំពេញអង្គគណៈរដ្ឋមន្ត្រីដំបូងរបស់រាជរដ្ឋាភិបាលនីតិកាលទី៧ នៃរដ្ឋសភានេះឱ្យបានទូលំទូលាយដល់សាធារណជន»។
គួរឱ្យដឹងផងដែរថាលោក ហ៊ុន ម៉ាណែត ត្រូវបានក្លាយជានាយករដ្ឋមន្ត្រីទី៣៣ របស់កម្ពុជាជាផ្លូវការនៅថ្ងៃទី២២ ខែសីហា បន្ទាប់ពីត្រូវបានសភាបោះឆ្នោតផ្ដល់សេចក្ដីទុកចិត្តលើគណៈរដ្ឋមន្ត្រីរបស់លោក និងបានចូលទៅផឹកទឹកសម្បថនៅក្នុងព្រះបរមរាជវាំងរួចនៅរសៀលថ្ងៃដដែល៕